Bemoediging van Jesus

JESUS MOEDIG ONS AAN:

• OM ALTYD TE BID
• OM NOOIT MOEDELOOS TE WORD NIE

Shalom, geliefdes van God.🤗♥️ Mag God ons hemelse Vader jou seën en mag die woorde van ons Here Jesus jou aanmoedig om altyd te bid en nooit moedeloos te word nie. Hou aan om te bid, moet nooit ophou nie, selfs al lyk dit of God sy tyd neem om ons gebede te beantwoord. God sal ons gebede beantwoord, omdat Hy getrou is en Hy ons liefhet. God is selfs lankmoedig teenoor ons vyande soos ons ook behoort te wees. Halleluyah! Asseblief, Here help ons om meer soos U te wees en om selfs met ons vyande lankmoedig te wees. Alle eer aan ons God vir Sy liefde en om so geduldig te wees met almal en dat Hy vir ons omgee, dat Hy ons aanmoedig en altyd hoop gee! Dankie Vader. Ons het U lief Here.♥Amen.

'EN Hy het ook aan hulle 'n gelykenis vertel met die oog daarop dat 'n mens GEDURIG MOET BID en NIE MOEDELOOS WORD NIE, en gesê:

Daar was 'n regter in 'n stad wat God nie gevrees en geen mens ontsien het nie.

En daar was in daardie stad 'n weduwee, en sy het gedurig na hom gekom en gesê: Doen reg aan my teenoor my teëparty.

En 'n tyd lank wou hy nie; maar daarna het hy by homself gesê: Al vrees ek God ook nie en al ontsien ek geen mens nie, tog sal ek, omdat hierdie weduwee my moeite gee, aan haar reg doen, sodat sy nie eindelik kom en my in die gesig slaan nie.

Toe sê die Here: Hoor wat die onregverdige regter sê.
Sal God dan nie reg doen aan sy uitverkorenes wat dag en nag tot Hom roep nie, al is Hy ook lankmoedig in hulle geval?

Ek sê vir julle dat Hy gou aan hulle reg sal doen; maar as die Seun van die mens kom, sal Hy wel die geloof op die aarde vind?'

LUKAS 18:1-8

Bely sondes teenoor mekaar

Vrede van ons Vader en Here Jesus vir julle.  Ons moet ons sondes teenoor mekaar bely en vir mekaar bid, sodat ons genees kan word.  Die Here ons God is ons skild en bewaar ons van alle gevare. Ken Hom in al jou planne, roep uit na Hom, loof Hom, prys Hom, want Hy alleen is waardig en die enigste Een wat ons uit hierdie droogte kan red.

Laat ons in heiligheid wandel. Wees heilig, want ons God is heilg. Ons is nie gemaak om te lyk, te praat en klink soos die wêreld nie. Ons moet uitstaan van die wêreld. Ons moet wees soos 'n lig op die heuwel.
Die wêreld moet getrek word na die lig wat in ons skyn, in ons lewenswandel, in ons dade, in ons woorde.
Hoe kan dit gebeur wanneer daar geen onderskeid is tussen die Here se kerk en die wêreld nie? 

O Here vergewe ons! Bring U afgedwaalde skape terug met U stok en U staf op die smal weg sodat ons kan ingaan by die nou ingang, want daar is min wat daarop wandel en min wat daar ingaan.
 

Geloof, vergifnis en gebed

Voordat ons bid, moet ons alle onvergewensgesindheid wat ons in ons harte teen iemand koester, laat staan. As ons dit nie doen nie, sal God ons nie ons sondes vergewe nie.
 

As jy sukkel om iemand te vergewe, neem dit na God in gebed, wees eerlik met God, vra Hom om jou te help.  Bid vir diegene wat jou seergemaak het, wat verkeerd gedoen het teenoor jou. Bid vir hulle met jou hele hart. Dit sal jou verander, dit sal maak dat jy groei in jou liefde vir ander, selfs jou vyande, net soos Jesus gesê het, dat ons ons vyande moet liefhê, ons moet vir hulle bid, ons moet hulle seën.
God is getrou en sal jou help en jou hart vul met Sy liefde en genade en vergifnis vir mense.

God seën julle.

Bid altyd

In die Bybel word ons aangesê om altyd te bid. Van die Ou Testament tot die Nuwe Testament...BID, want dit is wat God van ons verwag omdat ons met Christus Jesus verenig is. Ons veg 'n geestelike stryd in gebed. Elke Christen is 'n vegter in die geestelike stryd wat ons voer. Laat ons getrou en ywerig in gebed wees. Laat ons nie laks wees aangaande ons gebedslewe nie, want deur laksheid in gebed gee ons die duiwel 'n kans om 'n voet in die deur te kry in ons lewens.

Ek het wagte op jou mure gesit, Jerusalem. Hulle sal dag en nag bid. Julle wat die Here herinner aan sy beloftes, moenie rus nie.
~•Jesaja 62:6

Moenie ophou bid nie.
~•1 Tessalonisense 5:17